गणेश लङ्वाको अध्यक्षतामा ताप्लेजुङमा खो-खो कार्यसमिति गठन

ताप्लेजुङ

श्रावण ३१ गते ।ताप्लेजुङमा जिल्ला स्तरीय 'खो-खो' कार्यसमिति गठन गरिएको छ।

आइतबार गणेश लङ्वाको अध्यक्षतामा ९ सदस्य कार्यसमिति चयन गरिएको हो । अब उक्त कार्यसमितिले जिल्लाका विभिन्न पालिकाहरूमा समन्वय गरी विद्यालयका शिक्षकलाई खो - खो सम्बन्धी तालिम दिने ,जिल्लाका प्रतियोगिताहरूमा खो-खो समेट्न भूमिका निर्वाह गर्ने बताइएको छ।

राष्ट्रिय खेलकुदमा समेत ताप्लेजुङको सहभागिता जनाउन प्रयास गरिने नवगठित कार्यसमितिले जनाएको छ।

समितिको उपाध्यक्ष ,सचिव र कोषाध्यक्षमा क्रमश : भगवान सिंह एभेङ,दिलेन्द्र राई र विनोद पोमु चयन हुनुभएको छ भने सदस्यहरूमा राजेश गुरुङ, भूपेन्द्र श्रेष्ठ ,जीवन पोखरेल, खिनुमाया इजम र गणेश मादेनलाई चयन गरिएको हो।

खो–खो भारतमा उत्पत्ति भएको परम्परागत दौड–पकडको खेल हो। यसको आधुनिक र नियमबद्ध स्वरूप भारतको महाराष्ट्र, विशेषगरी पुणे क्षेत्रमा विकास भएको मानिन्छ।

नेपालमा खो–खो संघ औपचारिक रूपमा वि.सं. २०५२ सालमा स्थापना/राष्ट्रिय खेलकुद परिषद्मा दर्ता भएको हो। त्यसबेला डा. रामकृष्ण महर्जनको अध्यक्षतामा तदर्थ समिति गठन भएको थियो।