ताप्लेजुङबाट दुई दिनमा दुई बेवारिसे व्यक्तिको उद्धार

रेडियो ताप्लेजुङ
कार्तिक २० गते ।

ताप्लेजुङबाट पछिल्लो दुई दिनको अवधिमा दुई जना बेवारिसे अवस्थामा रहेका व्यक्तिको उद्धार गरिएको छ।

सामाजिक संस्था ‘होप फर अल’ र ताप्लेजुङस्थित विश्वकर्मा युवा सङ्गठनका अध्यक्ष प्रकाश विश्वकर्माको सक्रियतामा छुट्टाछुट्टै घटनामा दुई जनाको उद्धार गरिएको हो।

विश्वकर्माको पहलमा फुङ्लिङ बजारमा बेवारिसे अवस्थामा हिड्ने अन्दाजी ६५ वर्षीय बुद्धवीर लिम्बूको उद्धार गरी विहिबार मानव सेवा आश्रम काँकडभिट्टा पठाइएको छ। लिम्बूको उद्धारका लागि विभिन्न व्यक्तिहरूले समेत सहयोग गरेको विश्वकर्माले रेडियो ताप्लेजुङलाई जानकारी दिनुभएको छ।

यस्तै, ‘होप फर अल’ले सदरमुकामस्थित वीरेन्द्रचोक आसपासमा बेवारिसे अवस्थामा हिड्ने २३ वर्षीय युवकको उद्धार गरेको छ। मानसिक सन्तुलन ठीक नभएका फक्ताङलुङ गाउँपालिका–५ का अभिषेक लिम्बूलाई उद्धार गरी शुभारम्भ फाउन्डेसन बिर्तामोड पठाइएको संस्थाका अध्यक्ष मौसम गुरुङले जानकारी दिनुभएको छ।

गुरुङका अनुसार लिम्बूलाई केही समयअघि सर्पले टोकेको थियो। पारिवारिक आर्थिक अवस्था कमजोर भएका कारण उपचार नपाउँदा उनको मानसिक सन्तुलनमा समस्या आएको बताइएको छ। सोही अवस्थालाई मध्यनजर गर्दै उनको उद्धार गरिएको गुरुङले बताउनुभयो।

दुवै उद्धारकर्ताले आगामी दिनमा पनि सामाजिक कार्यलाई निरन्तरता दिने प्रतिबद्धता जनाएका छन्।

सूचना : यस रेडियो ताप्लेजुङको वेबसाइटमा प्रकाशित समाचार कुनै पनि छापा वा डिजिटल माध्यममा बिना अनुमति कपी गरी प्रकाशन वा प्रसारण नगरिदिनुहोला। स्पष्ट स्रोत नखुलाएमा विद्युतीय ऐन अन्तर्गत भइ जाने व्यहोरा जानकारी गराइन्छ ।


                                                            ©  रेडियो ताप्लेजुङ