पाथीभरा देवी दर्शन केबलकारद्वारा दोभान अग्निपीडितलाई पाँच लाख रुपैयाँ सहयोग

रेडियो ताप्लेजुङ

ताप्लेजुङ, असोज १४ गते । मेरिङदेन गाउँपालिका–३ स्थित दोभान बजारमा गत असोज ८ गते भएको आगलागीबाट प्रभावित परिवारका लागि पाथीभरा देवी दर्शन केबलकार प्रालिले पाँच लाख रुपैयाँ आर्थिक सहयोग गरेको छ।

बुधबार कम्पनीका प्रतिनिधिहरूले आगलागी प्रभावित क्षेत्रमा पुगेर उक्त रकम हस्तान्तरण गरेका हुन्।

मेरिङदेन गाउँपालिकाका अनुसार आगलागीबाट भएको क्षतिको आधारमा १६ परिवारलाई प्रतिपरिवार न्यूनतम १५ हजारदेखि अधिकतम ५० हजार रुपैयाँसम्म वितरण गरिएको छ।

विपद्को विषम परिस्थितिमा पीडित परिवारप्रति कम्पनीले देखाएको मानवीय संवेदनशीलता, उत्तरदायित्व र सहयोगका लागि गाउँपालिकाले आभार व्यक्त गरेको छ।

यसैबीच, देश तथा विदेशबाट सहयोग गर्न चाहने दाताहरूको सहजताका लागि गाउँपालिकाले प्रकोप व्यवस्थापन खातासमेत सञ्चालनमा ल्याएको जनाएको छ। उक्त खातामार्फत अग्निपीडित परिवारलाई आर्थिक सहयोग गर्न सकिने गाउँपालिकाले जनाएको छ।

सूचना : यस रेडियो ताप्लेजुङको वेबसाइटमा प्रकाशित समाचार कुनै पनि छापा वा डिजिटल माध्यममा बिना अनुमति कपी गरी प्रकाशन वा प्रसारण नगरिदिनुहोला। स्पष्ट स्रोत नखुलाएमा विद्युतीय ऐन अन्तर्गत भइ जाने व्यहोरा जानकारी गराइन्छ ।